Tolosaldeko Hitza

Orexako jaien baitan, txistu soinua, musika, apustuak eta goitiberak

ERREDAKZIOA

Gaur, Santa Kruz Eguna izanik, Orexako festetako egunik handiena izango dute goizetik hasita. Oilarraren jaitsierak iragarri zituen festak atzo gauean, eta bi egun dauzkate aurretik orexarrek.

Gaur 12:00etan herriko txistulariek diana egingo dute, eta ondoren herriko auzoen artean apustua izango da. Aurtengo berritasunen artean goitiberen txapelketa izango da eta hauek arratsaldean, 18:00etatik aurrera abiatuko dira aldapa behera. 21:00ak aldera afarian herritarrak elkartu egingo dira, ondoren erromeriaz gozatzeko. Elortza eta Iñaki trikitilariak daude horretan, musikan. DJ Bull ere ez da faltako.

Baratzuri zopa eta kalejira izango dira gehien irauten dutenentzat. Orduan ere musika izango da.

Bihar, arratsalde alaia

Festei amaiera emateko 18:00etan herri kirolak antolatu dituzte aizkolari eta harri-jasotzaileekin. Bukatzeko, sagardo dastaketa eta bertsolariak izango dira.